Verkefnið er þróað og því viðhaldið af sjálfboðaliðum. Sjálfboðaliðar eru kjarninn í F-Droid. Þú getur hjálpað:
Hjálpa öðrum
Ef þú veist þegar sitthvað um F-Droid, þá gætir þú kennt öðrum á það og hvernig eigi að komast í gang. Hjálpaðu til við að svara spurningum sem notendur og forritarar eru með um F-Droid! Taktu tillit til siðareglna okkar. Við viljum að samskiptin og umhverfið séu sem jákvæðust og ánægjuleg fyrir alla.
Tilkynna um vandamál
Ef þú rekst á vandamál með vefinn eða F-Droid forritið, geturðu tilkynnt þau í viðeigandi verkskráningarformi), rætt þau á spjallsvæðinu, eða tekið þátt í spjallinu í gegnum þann samskiptamáta sem þér hentar. Við þiggjum líka hjálp við umsjón með verkbeiðnum, til dæmis með að spyrja spurninga varðandi eftirfylgni, yfirfara sameiningarbeiðnir, setja inn merkingar og fleira í þeim dúr.
Senda inn forrit
Ef þú sérð forrit sem vantar í hugbúnaðarsafnið (eftir að hafa lesið skilyrðin fyrir innsetningu), þá máttu gjarnan leggja það fram í gegnum sérstaka þráðinn Requests For Packaging í verkskráningunni.
Ef þú ert með tæknilegu kunnáttuna sem til þarf, geturðu líka púslað saman viðeigandi lýsigögnum og sent þau inn í gegnum F-Droid gagnasafnið (data repository), sem myndi hraða því gríðarlega hvort forritið yrði haft með.
Það sama gildir fyrir hjálp við að byggja nýjar útgáfur forrita.
Frekari upplýsingar er að finna í hjálparskjölum okkar, eða með því að spyrja á spjallinu.
Þýðingar
F-Droid forritið er tiltækt á mörgum tungumálum. Ef tungumálið þitt er ekki eitt af þeim, eða að það þurfi aðhlynningar við, endilega skráðu notandareikning fyrir þig og nýttu þér þýðingakerfið til að koma inn breytingunum sem þér finnast við hæfi.
Byrjaðu á að skoða yfirlitið á Þýðingar og staðfærsla. Það er líka [sérstakur flokkur á spjallsvæðinu fyrir umræður tengdar þýðingum.
Prófa
Prófanir á væntanlegum útgáfum F-Droid eru besta leiðin til að ganga úr skugga um að nýjar útgáfur geri það sem þeim er ætlað að gera. Og að sjálfsögðu, ef þú tilkynnir einhver vandamál til okkar, þá munum við vita um vandamálið og getum reynt að laga það! Ef þú rekst á galla sem þarf að tilkynna, þá skaltu skoða verkbeiðnasíðuna. Einn auðveldur staður þar sem hægt er að aðstoða er að yfirfara uppfærðar þýðingar á https://staging.f-droid.org/.
Forritun
Það eru fjögur aðal git-söfn sem hýst eru á GitLab:
- Android-biðlaraforritið.
- Verkfæri fyrir netþjóna til að keyra hugbúnaðarsöfn og byggja eða setja upp forrit á eigin vél.
- Tengdar lýsigagnaskrár fyrir forrit í aðalsafni F-Droid.
- Vefsvæði og hjálparskjöl.
Einfaldasta leiðin til að taka þátt í þróuninni er að klóna þessi verkefni og senda síðan inn sameiningarbeiðnir (merge requests). Sértu að gera stórar eða víðværar breytingar, er best að ræða þær fyrirfram á IRC eða spjallsvæðinu, til að tryggja að þær samræmist stefnu verkefnisins og rekist ekki á eða tvítaki vinnu sem þegar er í gangi.
Þegar unnið er með vefþjóns- og gagnaverkefnin, er alltaf góð hugmynd að lesa handbókina.
Viðhalda stoðkerfi
F-Droid býður upp á marga netþjóna (byggingasvæði, vefgátt, niðurhalssvæði og fleira) sem þurfa reglulegt viðhald, dreifingu samkvæmt Ansible-aðferð auk stýringar á vélbúnaði. Nánari upplýsingar má finna með því að spyrja á spjallinu eða senda póst á [email protected].
Gagnavísindi
Í grunninn er F-Droid risastórt safn gagna um forritin sem við dreifum. Þarna eru atvikaskrár byggingar, lýsigögn forrita, grunnkóði, APK-lýsigögn og fleira. F-Droid passar einnig við hið víðara Android-umhverfi, þar sem eru enn fleiri gögn til að baða sig í. Við erum líka með ýmis mæligögn sem lítið hafa verið notuð, en sem gætu gefið áhugaverðar upplýsingar um hreyfingar í F-Droid-umhverfinu. Góð leið til að dýfa sér í þetta er að prófa API-kerfisviðmótið okkar.
