śrīrāmarakṣāstotra
atha śrīrāmarakṣāstotraṃ
॥ Om̃ śrīgaṇeśāya namaḥ ॥
asya śrīrāmarakṣāstotramaṃtrasya । budhakauśika ṛṣiḥ ।
śrīsītārāmacaṃdro devatā । anuṣṭubh chaṃdaḥ ।
sītā śaktiḥ । śrīmad hanumān kīlakam ।
śrīrāmacaṃdraprītyarthe rāmarakṣāstotrajape viniyogaḥ ॥
॥ atha dhyānam ॥
dhyāyedājānubāhuṃ dhṛtaśaradhanuṣaṃ baddhapadmāsanasthaṃ
pītaṃ vāso vasānaṃ navakamaladalaspardhinetraṃ prasannam ।
vāmāṃkārūḍha sītāmukhakamalamilallocanaṃ nīradābhaṃ
nānālaṃkāradīptaṃ dadhatamurujaṭāmaṃḍanaṃ rāmacaṃdram ॥
॥ iti dhyānam ॥
caritaṃ raghunāthasya śatakoṭi pravistaram ।
ekaikamakṣaraṃ puṃsāṃ mahāpātakanāśanam ॥ 1॥
dhyātvā nīlotpalaśyāmaṃ rāmaṃ rājīvalocanam ।
jānakīlakṣmaṇopetaṃ jaṭāmukuṭamaṃḍitam ॥ 2॥
sāsitūṇadhanurbāṇapāṇiṃ naktaṃcarāntakam ।
svalīlayā jagatrātuṃ āvirbhūtaṃ ajaṃ vibhum ॥ 3॥
rāmarakṣāṃ paṭhetprājñaḥ pāpaghnīṃ sarvakāmadām ।
śirome rāghavaḥ pātu bhālaṃ daśarathātmajaḥ ॥ 4॥
kausalyeyo dṛśau pātu viśvāmitrapriyaśrutī ।
ghrāṇaṃ pātu makhatrātā mukhaṃ saumitrivatsalaḥ ॥ 5॥
jivhāṃ vidyānidhiḥ pātu kaṃṭhaṃ bharatavaṃditaḥ ।
skaṃdhau divyāyudhaḥ pātu bhujau bhagneśakārmukaḥ ॥ 6॥
karau sītāpatiḥ pātu hṛdayaṃ jāmadagnyajit ।
madhyaṃ pātu kharadhvaṃsī nābhiṃ jāmbavadāśrayaḥ ॥ 7॥
sugrīveśaḥ kaṭī pātu sakthinī hanumatprabhuḥ ।
ūrū raghūttamaḥ pātu rakṣaḥkulavināśakṛt ॥ 8॥
jānunī setukṛtpātu jaṃghe daśamukhāntakaḥ ।
pādau bibhīṣaṇaśrīdaḥ pātu rāmokhilaṃ vapuḥ ॥ 9॥
etāṃ rāmabalopetāṃ rakṣāṃ yaḥ sukṛtī paṭhet ।
sa cirāyuḥ sukhī putrī vijayī vinayī bhavet ॥ 10॥
pātālabhūtalavyomacāriṇaśchadmacāriṇaḥ ।
na draṣṭumapi śaktāste rakṣitaṃ rāmanāmabhiḥ ॥ 11॥
rāmeti rāmabhadreti rāmacaṃdreti vā smaran ।
naro na lipyate pāpaiḥ bhuktiṃ muktiṃ ca vindati ॥ 12॥
jagajjaitreka maṃtreṇa rāmanāmnā'bhirakṣitam ।
yaḥ kaṃṭhe dhārayetasya karasthāḥ sarvasiddhuyaḥ ॥ 13॥
vajrapaṃjaranāmedaṃ yo rāmakavacaṃ smaret ।
avyāhatājñaḥ sarvatra labhate jayamaṃgalam ॥ 14॥
ādiṣṭavān yathā svapne rāmarakṣāmmimāṃ haraḥ ।
tathā likhitavān prātaḥ prabhuddho budhakauśikaḥ ॥ 15॥
ārāmaḥ kalpavṛkṣāṇāṃ virāmaḥ sakalāpadām ।
abhirāmastrilokānāṃ rāmaḥ śrīmān sa naḥ prabhuḥ ॥ 16॥
taruṇau rūpasaṃpannau sukumārau mahābalau ।
puṃḍarīkaviśālākṣau cīrakṛṣṇājināmbarau ॥ 17॥
phalamūlāśinau dāntau tāpasau brahmacāriṇau ।
putrau daśarathasyaitau bhrātarau rāmalakṣmaṇau ॥ 18॥
śaraṇyau sarvasattvānāṃ śreṣṭhau sarvadhanuṣmatām ।
rakṣaḥ kulanihaṃtārau trāyetāṃ no raghūttamau ॥ 19॥
āttasajjadhanuṣāviṣuspṛśāvakṣayāśuganiṣaṃgasaṃginau ।
rakṣaṇāya mama rāmalakṣmaṇāvagrataḥ pathi sadaiva gacchatām ॥ 20॥
sannaddhaḥ kavacī khaḍgī cāpabāṇadharo yuvā ।
gacchanmanorathosmākaṃ rāmaḥ pātu salakṣmaṇaḥ ॥ 21॥
rāmo dāśarathiḥ śūro lakṣmaṇānucaro balī ।
kākutsthaḥ puruṣaḥ pūrṇaḥ kausalyeyo raghūttamaḥ ॥ 22॥
vedāntavedyo yajñeśaḥ purāṇapuruṣottamaḥ ।
jānakīvallabhaḥ śrīmān aprameya parākramaḥ ॥ 23॥
ityetāni japannityaṃ madbhaktaḥ śraddhayānvitaḥ ।
aśvamedhādhikaṃ puṇyaṃ samprāpnoti na saṃśayaḥ ॥ 24॥
rāmaṃ durvādalaśyāmaṃ padmākṣaṃ pītavāsasam ।
stuvaṃti nāmabhirdivyaiḥ na te saṃsāriṇo naraḥ ॥ 25॥
rāmaṃ lakṣmaṇapūrvajaṃ raghuvaraṃ sītāpatiṃ suṃdaraṃ
kākutsthaṃ karuṇārṇavaṃ guṇanidhiṃ viprapriyaṃ dhārmikam ।
rājeṃdraṃ satyasaṃdhaṃ daśarathatanayaṃ śyāmalaṃ śāṃtamūrtiṃ
vaṃde lokābhirāmaṃ raghukulatilakaṃ rāghavaṃ rāvaṇārim ॥ 26॥
rāmāya rāmabhadrāya rāmacaṃdrāya vedhase ।
raghunāthāya nāthāya sītāyāḥ pataye namaḥ ॥ 27॥
śrīrāma rāma raghunaṃdana rāma rāma
śrīrāma rāma bharatāgraja rāma rāma ।
śrīrāma rāma raṇakarkaśa rāma rāma
śrīrāma rāma śaraṇaṃ bhava rāma rāma ॥ 28॥
śrīrāmacaṃdracaraṇau manasā smarāmi
śrīrāmacaṃdracaraṇau vacasā gṛṇāmi ।
śrīrāmacaṃdracaraṇau śirasā namāmi
śrīrāmacaṃdracaraṇau śaraṇaṃ prapadye ॥ 29॥
mātā rāmo matpitā rāmacaṃdraḥ ।
svāmī rāmo matsakhā rāmacaṃdraḥ ।
sarvasvaṃ me rāmacaṃdro dayāluḥ ।
nānyaṃ jāne naiva jāne na jāne ॥ 30॥
dakṣiṇe lakṣmaṇo yasya vāme tu janakātmajā ।
purato mārutiryasya taṃ vaṃde raghunaṃdanam ॥ 31॥
lokābhirāmaṃ raṇaraṃgadhīram ।
rājīvanetraṃ raghuvaṃśanātham ।
kāruṇyarūpaṃ karuṇākaraṃ tam ।
śrīrāmacaṃdram śaraṇaṃ prapadye ॥ 32॥
manojavaṃ mārutatulyavegam ।
jitendriyaṃ buddhimatāṃ variṣṭham ।
vātātmajaṃ vānarayūthamukhyam ।
śrīrāmadūtaṃ śaraṇaṃ prapadye ॥ 33॥
kūjaṃtaṃ rāma rāmeti madhuraṃ madhurākṣaram ।
āruhya kavitāśākhāṃ vaṃde vālmīkikokilam ॥ 34॥
āpadāṃ apahartāraṃ dātāraṃ sarvasampadām ।
lokābhirāmaṃ śrīrāmaṃ bhūyo bhūyo namāmyaham ॥ 35॥
bharjanaṃ bhavabījānāṃ arjanaṃ sukhasampadām ।
tarjanaṃ yamadūtānāṃ rāma rāmeti garjanam ॥ 36॥
rāmo rājamaṇiḥ sadā vijayate rāmaṃ rameśaṃ bhaje
rāmeṇābhihatā niśācaracamū rāmāya tasmai namaḥ ।
rāmānnāsti parāyaṇaṃ parataraṃ rāmasya dāsosmyahaṃ
rāme cittalayaḥ sadā bhavatu me bho rāma māmuddhara ॥ 37॥
rāma rāmeti rāmeti rame rāme manorame ।
sahasranāma tattulyaṃ rāmanāma varānane ॥ 38॥
॥ iti śrībudhakauśikaviracitaṃ śrīrāmarakṣāstotraṃ sampūrṇam ॥
॥ śrīsītārāmacaṃdrārpaṇamastu ॥
