Durtlang Khaw Dintu Pu M Suaka Chanchin
Pu M.Suaka hi a hming dik tak chu Suakmichhinga a ni a, February 1868-ah Lunghret (Thingsulthliah hnuai) ah a piang a. A nu leh pa chu Chawnghuliana leh Chawngpuithangi Chawngthu, Vanchiau ve ve an ni a, a farnu pahnihte leh a nau Dosatthanga te nen Muthi-ah an pem a. Khawchhak ral hlauvin Mualvum leh Bualpuiah te an pem a, Bualpui ah hian kum 1881-ah inkar hlat lovin a pa leh a nu in an thihsan a.Lal khawnbawl upa, Zapuithanga Chawngthu Thangchhung-in a inah a fa te ang chiahin a awmpui ta a. Kum 1890 August thlaah Sentlang lal Kalkhama'n Vailian kah a duh tlat mai a.A upa Zapuithanga chuan,"Sawrkar hi i do lovang u," tiin lal chu thurawn a pe a, chu thurawn chu pawm duh lovin Vailian kah chu a tum ta a.Zapuithanga pawh a hnawtchhuak ta a.Suak ate unau nen Changsilah vai an bel ta a.A fapa Thangphunga (Chaltlang lal nita) te nen Manding sap (Capt.Loch) sipai rawsawt ei ve phalsak niin, April-May 1892-ah Aizawl kulh an lut chho ve zel a, Sawrkar mi hriat an lo ni chho ta zel a ni.Pu Suaka hian Aizawl leh Sairang inkarah thla thum chhung, thlatin Rs.30 hlawhin Dak la hna a thawk a, Kum 1894-ah Bawrhsap Office-ah Orderly, thlatin Rs.10 hlawhin a thawk leh a.October 1,1894- ah Lushai Clerk Babu ah thlatin Rs.35 hlawhin a kaisang a.Pu Buanga ten anmahni thawh rah in Babu a han kai chho chu an lawm em em a ni."Babu" chu Bengali tawng a ni a, Mizo chuan 'Ka pu',kan ti ang", an ti a.Mizo 'Ka Pu' kai hmasa ber a ni awm e.Lushai Clerk hna a thawh chhung hian Bawrhsap tam tak thawhpui in, sawrkar din fel leh C.I. biak siam fel te, lal ramri lehkha siam fel te leh tawng lehlin te hi a thawk nasa em em a ni.Kum 1907-ah Sub-Inspector of Police 5th Grade-ah thlatin Rs.60 hlawhin a kaisang leh a.Lunglei, Tlabung leh Sairangah te a thawk a.April 1,1914-ah thlatin Rs. 17-1-0 =Rs.17.06 in a pension ta ani. Tin,Mission Sapupa leh Pu Buanga te Mizotawng zirtirtu a ni a.Kum 1893-ah A, Aw,b an siam a.Pathian thu,Luka ziak,Tirhkohte Thiltih leh Thu Inchhang te an siam a ni. Kum 190-a khasi rama Harhna an zuk chawkchhuah atangin Pathian thuawih nih a beisei a, November 1906 atangin Zu in a sim a ni. Hetih lai hian Venghlui-ah a awm a.Tumkhat chu luhkapuiah a ding a, ni chhuahna lamah(inlarnain0 lal Isua Kros-a an khenbeh lai, thi hnuang mai hi a hmu a, a hmel atang chuan a hmangaihna nasatzia leh ama sualnate chiang em emin a hmu a, Kristianah a hming a pe ta ani.December 26,1907-ah an chhungin pu Zosaphluia kutah Baptisma an chang a.Pathian thu a awih tak atangin a dam chhungin Kohhran, Khawtlang leh inkhawmpui rorelnaah thahnem ngai em em leh rinawm takin a theihtawpin a sulsutu niin a thawk a ni.A thlarau mi em em a, Krista ram zau nan a thawk nasa a.Mi rethei leh tanpui ngaite a ngaihsakin a pui nasa em em a ni.Khawtlang leh Kohhrana a hnathawh te thlirin Pu M.Suaka hian "Mi Ropui" nih a phu tak zet a ni. Chutiang mi ropui, Durtlang Kohhran leh Khawtlang tana rohlu, Pu M Suaka chuan July 12,1953 khan, kum 85 mi niin he khawvel hi alo chhuahsan ta a ni.A ruang hi Durtlang Kohhran Biak In tualah phum a ni a.Kum 1964a thi, a nupui Pi Lalbeveli nen phum dun an ni.An thlanlungah chuan hetiang hian ziah a ni: DURTLANG LAL M.SUAKA 1868-1953 LEH A NUPUI LALBEVELI 1873-1964 KRISTIAN KHUA ATANA DURTLANG DINTU LEH DURTLANG DAMDAWI IN HMUN RAM PETU. Pu M.Suaka chanchin hi a bu-a ziah tham a ni a, hetah hian tlemte chauh tarlan a ni.
