INYIGISHO KU CYUMWERU CYA 17 GISANZWE A
Amasomo: 1 Bam 3,5.7-12; Zab 118 9 119); Rom 8,28-30; Mt 13,44-52
Byose bihira abakunda Imana!
Bakristu bavandimwe Kristu Yezu akuzwe, amasomo matagatifu yo kuri iki cyumweru cya 17
gisanzwe, araduhamagarira kwibanda ku byiza, ku bintu bizahoraho.
Twumvise ubuhamya bw’umwami wari ukiri muto Salomoni. Yashoboraga gusaba Nyagasani
ngo amuhe kuramba azamare igihe kinini ku isi, cyangwa se agasaba ubukungu cyangwa urupfu
rw’abanzi be. Ariko rero nk’uko twabyumvise muri ririya somo, we yumvise neza ko ibyo atari
byo by’ingenzi, ni uko yisabira umutima wuje ubwenge kugira ngo ashobore kuyobora neza
umuryango w’Imana, awufashe kumenya guhitamo hagati y’ikiza n’ikibi. Asaba Nyagasani
impano ikomeye yo gukorera neza Imana n’umuryango wayo.
Ibyo byombi ntaho bihuriye n’ikuzo ry’umuntu ku giti cye, ubukungu, gufatwa nk’umuntu
w’igihangange n’ibyubahiro. Ahubwo ibyo yasabye Uhoraho birajyana no kwicisha bugufi.
Bavandimwe, iri somo natwe uyu munsi riradushishikaza kandi rikadusaba kwireba mu mutima
wacu : ese koko twebwe ni ubushishozi dusaba Nyagasani ? Nkeka ko ahubwo akenshi twizirika
ku gushimisha cyangwa gusubiza ibyiyumviro tuba twifitemo, ugasanga turagendera ku
marangamutima. Kuri iki cyumweru rero, nimureke iri sengesho rya Salomoni turigire iryacu.
Nyagasani aduhora hafi ngo adusakazemo ibyiza bye.
Uyu munsi arakubaza ati « saba, urumva naguha iki ? » wasaba iki ?
Bavandimwe, buri wese afite ibye yasaba bitewe n’ibyo afite ubu. Ntabwo byaba nka wa mugani
ngo « umutindi arota icyo ashaka » cyangwa ngo « umworo arota arya » , ariko twasaba icyo
dukennye. Ndahamya ko abasaba ubuhanga bwo kuyobora ubuzima bwabo muri iyi si mu kuri
no mu rukundo bataba benshi.
Burya kunyurwa kwa muntu ni ukuba mu Mana. Mutagatifu Agustini nyuma yo gushakisha
Imana igihe kinini ni we watangajwe no kuba yarayishakiye kure kandi iri hafi, imutuyemo.
Salomoni yasabye umutima ushishoza ngo ategeke umuryango w’Imana. Iyaba twasabaga
“ubuhanga n’ubushishozi bwo kumenya kwiyobora mu kuri no mu rukundo”. Uwabasha
kuyobora umubiri we n’ibyiyumviro byawo, akawuhunda imigenzo myiza, akitsindamo
ubugome n’urwango akimakaza urukundo muri we, ntaho atayobora. Uwabasha kwiyobora
akurikije amategeko y’Imana, yazataha neza.
Buri wese ashishoze neza amenye icyo ari busabe kandi kimufitiye akamaro, haba mu buzima
bwe mu mubano we n’Imana, haba mu mibanire ye n’abavandimwe. Ikibazo ni uko akenshi
twihitiramo ibitadufitiye akamaro.
Ubu ni na bwo butumwa mutagatifu Pawulo intumwa atugezaho ku buryo bwe mu isomo rya
kabiri. Arabwira abakristu b’i Roma bagendaga bacika intege kubera ingorane bahura na zo.
Arabagarura ku kintu cy’ingenzi abibutsa ko bari mu nzira y’Imana. Ati « Byose bihira abakunda
Imana ». Iyo nzira y’Imana abibutsa igira ibihe bitandukanye, harimo ibibazo n’ibigeragezo,
kugwa no kubyuka, ariko icya ngombwa tugomba kumenya ni uko ku iherezo ry’iyo nzira hari
ikuzo. Ntabwo tugomba gutinya kugendera mu nzira igoye dukurikiye Kristu.
Muri we tuba turi mu bumwe busesuye n’Imana Data. Abo Imana yamenye kuva kera,
yanabageneye guhabwa isura y’Umwana wayo, ngo abe umuvukambere mu bavandimwe benshi.
Mu ivanjili ya none twongeye kumva Yezu atwigishiriza mu migani, agakoresha ibimenyetso
bitandukanye agira ngo adufashe gusobanukirwa n’ingoma y’Imana. Ati ingoma y’Imana imeze
nk’ubukungu bukomeye buhishe mu murima. Umuntu ubuguyeho arongera akabuhisha,
akagenda yishimye akagurisha ibyo atunze byose kugira ngo abashe kugura uwo murima maze
yegukane bwa bukungu buwuhishemo. Umuntu yakwibaza ati ese uriya muntu yabonye ate
ubukungu buri muri uriya murima ? Ibisubizo ntabwo ari byinshi : igisubizo nta kindi ni uko yari
mu murimo akora muri uwo murima. Burya Ingoma y’ijuru iraharanirwa .
Ubutunzi bwose bw’iyi si, ibyiza byose twagira muri iyi si ntacyo byaba bimaze tubuze icyo
kintu cy’agaciro. Uyu mugani wumvikana neza iyo tuzirikanye ko muri biriya bihe kubera
intambara za hato na hato zasenyaga imigi , zigasahura ibintu byinshi by’agaciro, abantu
bakundaga kubihisha babitabye mu mirima. Hari ubwo rero uwahishe ikintu cy’agaciro
yahitanwaga n’intambara. Ibyo yahishe bigahera aho. Ni muri urwo rwego umukozi ukora mu
murima utari uwe yashoboraga kugwa ku kintu cy’agaciro, ari byo uyu mugani usobanura. Aho
kwiba cya kintu agahitamo kugura umurima ngo agitunge ku buryo bwemewe.
Nyagasani aduha ubukungu buhanitse bwa bundi tugomba kubona iyo turi mu murimo
dushinzwe tuwukora neza. Umurimo ni Nyagasani wadusabye kuwitaho kuva akiturema nk’uko
igitabo cy’Intangiriro kibitubwira aho kigira kiti Imana yahaye muntu isi kugira ngo
ayitunganye. Gutunganya neza isi ni ugukora neza umurimo dushinzwe tugendeye ku Ijambo
ry’Imana. Ni ngombwa kuricengera kugeza ubwo turibonyemo ubukungu bwa bundi buha
igisobanuro n’icyanga cy’ubuzima bwacu.
Bavandimwe, Umugambi w’Imana kuri twe ni mwiza. Kugira ngo rero uwo mugambi ubashe
kujya mu bikorwa, tugomba kureka ibitekerezo byacu bidashyitse tukemera kwakira ibyo Imana
iduha. Mu kuzirikana ku Ijambo ryayo dusanga mu byanditswe bitagatifu ni ho tuzahura na Yo.
Uko isi irushaho gutera imbere niko havumburwa byinshi birushaho kunoza no kuryoshya
ubuzima bwa muntu. Bityo abantu bakishima, bakishimisha, bakidagadura, bakinezeza mu byiza
biri muri iyi si. Ibifasha umuntu kubaho neza akabaho yishimimye byose ni byiza. Imana yacu ni
Imana y’ibyishimo. Imana ntiyaremeye muntu kubaho mu gahinda no mu maganya. Yezu
yarababaye kugira ngo aturonkere ibyishimo. Igihe cyose dufite ibituma tubaho twishimye tujye
dushimira Imana. Ibyo byose bidushimisha, bifite agaciro ni byo Yezu agereranije n’ariya
masaro menshi y’uriya mucuruzi yagurisha kugira ngo agure isaro rimwe ry’agaciro kanini. Ibyo
byiza byose biri muri iyi si bitugeze ku Ngoma y’ijuru. Bitayitugejejeho byaba ari igice byaba ari
igicagate. Ibitworohera ni ibyo tubona ubu ariko Imana yaduhaye uburyo bwinshi budufasha no
kwibuka kurangamira iby’ijuru tudaheranwe n’iby’isi.
Natwe rero bavandimwe, Nyagasani yaduhurije hamwe mu izina rye kuri iki cyumweru twese
hamwe rero dusabwe n’ibyishimo kuko ari hagati yacu. Ibyo twamusaba n’umutima ushishoza
utayobowe n'ubwirasi yakiduha nta kabuza.
Nyagasani Yezu nabane namwe!
Padiri Emmanuel Nsabanzima/Butare.
