Ha’u-nia respeitus ba:
• Señora Sunita Caminha, Diretora Eskritóriu UN Women
• Señora Munkuhtuya Altangerel, UNDP nia Reprezentante Rezidente
• Señor Armando da Costa, Diretór Jerál, Sekretaria Estadu ba Igualdade
Jéneru no Inkluzaun
Bondia kolega sira hotu.
Onra boot ida bele hola-parte iha YSEALI nia Akademia Lideransa ba dahuluk iha
Timor-Leste. Iha tinan hirak ikus ne’e dezde Timor-Leste tama iha Ministériu
Negósiu Estranjeiru Estadus Unidus nia Inisiativa Líder Foinsae Sudeste Aziátiku,
ita haree ona númeru membru Timoroan nian sae too kuaze membrus liu 2000.
Ami mós haruka ona joven Timoroan liu 50 ba Estadus Unidus no nasaun sira iha
rejiaun Sudeste Aziátiku hodi serbisu-hamutuk ho sira-nia omólogu sira
dezenvolve programa-hirak ne’ebé responde ba dezafius globais ne’ebé ita hotu-
hotu hasoru.
Silvia Correia de Araújo, líder husi Timor-Leste nia Rede Feto YSEALI, hanesan
feto-ida entre feto joven sira ne’ebé viaja ba Jakarta hamutuk ho feto joven
Timoroan nain rua seluk, Ismenia Cabreira no Jonia Leite Soares, iha fulan Juñu
tinan 2019 hodi partisipa iha YSEALI nia Akademia Lideransa Feto.
Silvia komesa husi tempu ne’ebá hala’o ona programas barak iha Timor-Leste,
halibur feto foinsae sira hodi apoia malu iha ida-idak nia dezenvolvimentu
profisionál no pesoál. Nia mós sai ona defensora forte ba meiu-ambiente liuhusi
lidera programa kuda aihoris no konservasaun bee. Feto foinsae sira ohin iha ne’e
maka Timor-Leste nia futuru. Sira ne’e líderes inovadór, matenek, no forte ne’ebé
halao asaun hodi hadi’ak liután sira-nia komunidade sira .
Durante pandemia globál COVID-19 ita haree ona líder foinsae Timoroan sira
hamriik hodi responde ba dezafiu foun ne’e. Enkuantu pandemia espalla iha
mundu tomak, ami-nia Embaixada iha Dili ne’e hetan aprosimasaun husi membrus
YSEALI sira ne’ebé hakarak halo asaun hodi prevene propagasaun COVID-19 iha
sira-nia komunidade. Ho apoiu-orsamentu husi ami-nia Seksaun Asuntus Públiku,
líder foinsae sira ne’e dezenvolve ona programa sira no konsege ba too kedas iha
família liu 600 hodi fahe informasaun importante kona-ba saúde iha komunidade
kbiit-laek sira.
YSEALI nia Akademia Lideransa Feto ne’e ho objetivu dezenvolve bazeia ba susesu
hirak ne’e, liuhusi hakbiit feto barak liután hodi asumi papel lideransa iha sira-nia
komunidade no dezenvolve sira-nia karreira. Iha Estadus Unidus Amérika, feto sira
hetan ona respeitu boot liután iha polítika, negósiu, no sosiedade tanba deit feto
sira serbisu-hamutuk hodi promove sira-nia direitus. Maibé iha servisu barak
liután maka presiza atu halo. Feto sira iha Estadus Unidus Amérika kontinua
defende mudansa iha lejizlasaun ne’ebé haforte direitus umanus no direitu feto
sira-nian no promove kestaun sira hanesan konservasaun ambientál, igualdade
rasiál, no liberdade relijioza.
Inspira tebes bele haree feto foinsae Timoroan sira ohin hola-parte iha programa
ida-ne’e no serbisu atu alkansa objetivu sira ne’ebé ha’u fiar feto sira iha mundu
tomak fahe ba malu. Ha’u fiar katak buat ne’ebé importante liu atu lembra maka
ita feto sira presiza hamriik defende rasik ita-nia an no keta tauk espresa ita-nia
pontu-de-vista. Ita presiza haree valór iha ita-nia konviksaun rasik no servisu no
ideias husi feto maluk sira seluk. No ita presiza apoia malu, labele kompete malu
ka hatuun malu. Ita iha direitu atu ema rona no inklui iha aspetus hotu husi moris
polítika, ekonómika no sosiál.
Ha’u kongratula Silvia, Jonia, Ismenia, Elfy, Zezinha, no Benvinda ba sira-nia
servisu exelente hodi promove líder feto sira . Ha’u mós hakarak agradese imi-
hotu tanba hola-parte ona iha ekipa Akademia Lideransa Feto iha sira-nia servisu.
Ha’u agradese tanba líder importante Timoroan sira hola-parte mós iha esforsu
ida-ne’e, balun atu partisipa iha semináriu sira ne’ebé sei halao iha loron hirak
tuirmai. Sira sei fó konsellu no orientasaun valiozu ba membrus husi Akademia
Lideransa Feto Foinsae no ita espera ligasaun hirak ne’e kontinua ba oin.
Importante tebes atu Timor-Leste nia líder atuál sira apoia ho ativu feto foinsae
Timoroan sira nia aspirasaun sira ba lideransa. Rona malu no koalia sai halo ema
rona ita-boot sira-nia lian. Ha’u hein ba oin haree ita-boot sira hotu sai futuru
líderes Timor-Leste nian!
Obrigada barak
