I PIANGTHAR TUR KA TIH CHE HI MAK TI SUH

Bible Chang: Johana 3:3-7

SAWIHAWNNA

I piangthar tawh em? Pianthar dan I hria em? Piantharna bible-in min zirtir chu eng nge a
awmzia? tih zawhna hrang hrang te hi mi thenkhat tan chuan buaina a ni lo ang. Amaherawhchu,
piantharna chungchang hi mi tam tak buaina leh thlarau lama kan harsatna ala ni fo mai.
Chuvangin, tun tum kan sermonah hian Piantharna chungchang sawifiah kan tum dawn a ni.

PIANTHARNA AWMZIA

Isuan, Nikodema hnenah, “ tihtak meuhin, tihtak meuhin ka hrilh a che, mi tu pawh an
PIANTHAR loh chuan Pathian ram an hmu theilo vang,” a ti a. Nimahsela, Nikodema chuan,
“Mi a tar hnuin entin nge a pian theih ang? Anu pumah vawihnih lutin apiang thei em ni?” a ti a.
Helaia Isua leh Nikodema inbiakna a, Isuan Piantharna a sawi hi chu THLARAU PIAN
NAWNNA/THLARAU PA NENA INZAWM LEHNA a sawina a ni. Tihian sawifiah dawn ta
ila: Isuan, “PIANGTHARNA” tih a sawi hi, Mizo tawng bible a “pianthar/piangthar” ti a kan
hmuh leh, Sap tawng bible thenkhata piang nawn (born again) tih ringawt hi chuan a sawifiah
zolo deuhin a alang. Chuvangin, bible an ziahna tawngbul (Greek) tawng lamah chhui zau dawn
ta ila. Greek tawng chuan, piangthar kan tih hi; anothen {an'-o-then – tih a lam tur} tih a ni a.
Chumi awmzia chu, “chunglam atanga piang (being born from above) tih emaw, Vanlam/Pathian
atanga lo chhuak (of things which come from heaven or God)” tih a. Kan nihna hmasa Pathian
atanga piang kan nihna chu eden bawhchhiahna avangin Pathian lakah chuan thi kan ni a.
Amaherawhchu, Vanram hmu ve turin, Isua kaltlangin thlarauah kan pian leh a ngai a. Kan
thlarau nun leh Pathian thlarau chu a inzawm leh zet tur a ni. Kan pianna dik tak Pathian hnenah
kan piang leh tur a ni. Kan nun leh van nun/Pathian nen a inzawm leh tur ani a tihna a ni.
Nikodema hi chuan mihring pian nawn lehna (biological rebirth) a sawi a. Isua hi chuan thlarau
piantharna/thlrau Pathian nena inzawm lehna/kan nun leh van nun inzawm lehna (spiritual
rebirth) a sawi a ni.

PIANTHAR A TULNA
Ephesi 2:1 ah chuan, “Nangni pawh in bawhchhiat leh in sualte avanga thi in nih lai khan a
tinung che u a ni;” tih kan hmu a. Tin, Rom 5:12-ah chuan, “Chutichuan mi pakhat avangin sual
khawvelah a lut a, sual avangin thihna a lut bawk a, chutiang bawkin mi zawng zawngin thil an
lo tihsual avangin thihnain mi zawng zawng a fan chhuak ta a”, tih kan hmu bawk a. Helai bible
changa thi a sawi hi kan mihring taksa thihna nilovin kan thlarau thihna a sawina a ni. Zawhna
awm thei ta chu; engvangin nge kan thlarau chu thi tia kan Bible in a sawi? Eden bawhchhiatna
avanga misual kan lo nih tawh avang in (Genesis 3:1ff) leh Sam ziaktu pawhin a sawi angin
khawlohnaa din kan lo nih avangin piantharna chu kan chan a lo tul ta a ni. He bawhchhiatna
hian mihringa Pathian thlarau awm chuan mihring a chhuahsan a, Pathian nen an inzawmna a
chah tak avangin Pathian ngaih chuan mitthi a lo ni ta a ni. A chhan chu mihring thlarau nunna
chu Pathianah chauh a awm vang a ni. Johana 3:1-7 ah Isuan, Nikodema hnenah, “I piangthar tur
a ni“, tiin a hrilh a, a chhan chu chhandama kan awm theih nan leh Pathian rama kan luh theih
nan a ni. Isaia 53:6-ah chuan, “kan za hian berâm angin kan vâk bo va; mahni kawng kawngah
kan peng theuh va” a ti a, hetiang anga boralna kawng zawh mek kan nih avang hian kan
pianthar a lo tul ta a ni.

PIANTHARNA DIK
Piantharna dik kan neih nan hian “Tuiah leh Thlarauvah” kan pian a ngai a (Thlaraua pianna kan
sawifiah thawkhat a. ‘Tuia piang’ tih hi kan hriatthiam loh takin tawitein han sawifiah ila:
Kohhran thenkhat chuan tuia piang hi Baptisma niin an ngai a, thenkhat chuan kan piandan
pangai, nu pumchhung tuia atanga lo piang kan nihna a ni an ti bawk, hei bakah hian, Pathian
thua piang Eph. 5:26 tih te leh, Thlarau Thianghlima piang Johana 7:38-39 tih a sawifaih pawh
kan awm bawk. A tul chuan tum dangah “Tuia piang” tih hi kan la zir zau leh dawn nia). Kan
pian loh chuan Pathian ram chu kan lut thei dawn lo a ni. He bible chang awmzia hi entirna nen
sawifiah dawn ta ila: Ram pakhat chuan dan siam ta sela, chu dan chuan he ramchhunga piang lo
chu, tumah he ramah hian chen ve phal a ni lo, tiin. He ram chhunga cheng ve tur hian, an rama
chengte hming phuah ang in phuah hian awmzia a nei lo va, Thiam taka an tawng ang hman ve
theih hian awmzia a nei lo va, an chindan (tradition) lo chin ve hian awmzia a neilo, chumi rama
an ei ang te, an thuam ang te, thian tam tak neih te, an sakhuana ang va tawmpui te leh, thildang
zawng zawng khan awmzia a nei dawnlo tihna a nih chu. Chutiang chiah chuan Nikodema khan
felna kawng chu lo zawh nitin mahse, Thlarauah ala pian miau loh avangin, Krista kaltlanga nun
thar ala neih loh avangin awmzia a nei lo a ni. Piantharna hi Baptisma chan ringawt emaw,
kohhran leh thalai pawla inhman emaw, nun siamthatna emaw, thil tha tih tam emaw, kan thil
thalo tih thin te sim emaw, tanpui ngaite tanpui emaw mai a ni lova, kan nun hlui leh suahsualna
zawng zawngte bansana, sima Pathian hnena kir a, tuiah leh thlarauvah kan pian thar hi a ni
zawk a ni (Johana 3:5). Chu piantharna chuan kan nun a thlak danglam vek tur a ni.

Anih chuan thil tha tih chuan awmzia a neilo em ni? Kan hriatsual loh nan hei hi sawi tel a tha in
ka hria. Thil tha tih hi Isua ringtute leh mi piangtharte hian kan tih tur a ni. Amaherawhchu, tuiah
leh thlarauah kan piang hmasa zet tur tihna a ni. Nikodama thil tha tih hi thil sual a ni lo, mahse
kailawn hmasa zawk Isua a paltlang phawt tur a ni. Thlarauah a piang hmasa zet tur tihna a ni.

ENGTIN NGE KAN PIANTHAR ANG?

Kan pianthar dawn hian salvation camping-ah kher a ngai lo va, ri deuh huk leh, thlarau
hnathawh mak tak a awm kher angai hran lo, tah ruai ruai emaw, hlim ruih emaw, taksa chetna
chan kher a ngai lo tih kan hriat a tha. Mi tam tak chuan heng kan beisei avang hian, ‘ka va
danglam si lo ve’ kan ti chawk reng a ni. Duhthlanna zawkah a in nghat. Amaherawh chu, he
duhthlanna hi kan thinglung luanliam laiin (emotion san laiin: hlim viau lai, kan lawm viau lai,
kan lungngaih viau lai, kan thinrim viau lai) i siam lo ang u. Thinglung luanliam laia thutlukna hi
a fuh duh lo in, a tlo lo viau thin. Rilru fim tak pu chungin kan duhthlanna hi kan siam fo a tha a
ni. Tin, Pathian hi kan duh thlanna chungah a leng lo va. Piantharna pawh hi keimahni ngei duh
thlanna a kan pawm leh pawm lohah a in nghat tlat a ni. Lal Isua’n tumah piangthar turin min
nawr lui lo va, a duh apiang te erawh an sualna te a ngaihdam sak in a siamthara, a fa ni turin a
dinthara, a chhandam thin a ni. Chu chhandamna chu Pathian thilthlawnpek ropui tak a ni a
(Rom 5:15), a thisen hlutak chuan min tlan a ni (IPetera 1:18-19). Chuvangin, pianthar kan duh
chuan Isua hi lal leh chhandamtua kan pawm a, nitinin Pathian hnung zuiin felna kawng kan
zawh tur a ni.

THU TLANGKAWMNA

Piantharna awmzia, pianthar atulna, pianthar dan dik leh, engtia pianthar tur nge tih kan zir ho ta
a. Heng kan thil zir te hi chiang tak leh nghet taka hriat I tum ang u. Engvangin nge, mizote kan
pianthar dan leh kan piantharna hi tlo loh em em kan tih chuan, Pathian thu kan hriat chian tawk
loh vang (hrechiang nia kan inhriat pawh a lo dik tawk lo thei, fimkhur in, mahni phak tawhah
inzir zel I tum teh ang u), kan thatchhiat vang leh kan thlarau nun aia ngaih pawimawh zawk
thildang kan nei thin vang emaw, zirtirna dik zawn aia, thu sawithiam leh tihdamna lam kan
lawm lutuk te hi a ni ang. Theologian hmingthang tak Dietrich Bonhoeffer chuan, khawngaihna
man tlawm leh man to a tehkhin a. Chu a tehkhinnaah chuan, khawngaihna chu bazara kawrlum
mantlawm nen a tehkhin a ni. Chutiangin, sualna ngaihdam chungchangah te, serh leh sang leh,
sakhuana lama kan in enkawl dan te chu mipui te hnenah a man diklo in kan zuar a. A chang
phei chuan a man neilo in kan zuar bawk thin, chuvangin hetiang hi mipuiin an ngaisang lova, an
ha rei peihlo a ni, a ti ani. Khawngaihna manto chu, miin loah ro phum ruk a awm a ni tih hria a,
a neih zawng zawng pawh hlanralin he ro phum ruk lei nan hian a in hmangral thin a ti a ni.
Chutiangin, he piantharna hi, khawvel lama zakzeh nei chunga pawm chi a ni lo. Khawvel lam
man kawp char chara pianthar hi a rem lo a. Pathian thuin min zirtir dan pawh a ni lo tih I hre
thar leh ang u. Chuvangin, Piantharna dik nena, kan nun zawng zawnga Isua kan zui zel theih
nan…
LALPAN A THU MALSAWM RAWH SE