Tugire Kristu !

Umukama Yezu yapfuye akazuka, aje adusanga kuri uyu musi duhimbaza ivuka rya Nyina wiwe
Bikira Mariya, kugira ngo abandanye adutyororeshe ububasha bukarishe bw’ijambo ryiwe. Iryo
jambo ryigize umuntu mu nda ya Bikira Mariya maze isi yose ikaronka urukiza.

Ivuka rero rya Bikira Mariya ku Mukama Yezu Kristu mbere na Ekleziya yose, ni umusi mukuru.
Umusi w’ivuka rya Bikira Mariya ni ivuka rya Yezu Kristu ubwiwe. Akanyamuneza ko kuvuka kwa
Bikira Mariya Ekleziya yose ifise, ni na ko kanyamuneza ka Yezu Kristu ubwiwe ayibereye
Umutwe.

Muri iryo vuka rero isi yabonye umuco yari irindiriye itabizi; itabizi kuko uwo musi ntaco bamenye
ko muri uwo mwana w’umukobwa Ana na Yohakimu bari bamaze kwibaruka havamwo nyina
w’Umucunguzi Yezu Kristu, ko muri uwo mwana yavutse ku buryo buboneshwa amaso nk’abandi
bose, hashobora kuvuka(…) yategerezwa kuvyara ku buryo budasanzwe Jambo w’Imana Yezu
Kristu !

Ivuka rya Bikira Mariya ni akanyamuneza ka Data Umukama, ni akanyamuneza ka Yezu ubwiwe,
ni akanyamuneza ka Mutima Mweranda umugabo wa Bikira Mariya ; uwapfutse Bikira Mariya
maze hakavuka Umukama Yezu ; Yezu w’i Nazareti, Umwana wa Mariya.

Ivuka rya Bikira Mariya, ni akanyamuneza ku bavyeyi biwe b’umubiri : Yohakimu na Ana : abo
bavyeyi barahimbawe bavyaye uwo Mwana, nta nkeka. Uwo mwana w’Umukobwa, uwo
mwigeme, uwo mwana yabaye umwigeme yasamye imbanyi y’Umukama, yabaye akanyamuneza
k’abavyeyi biwe. Ntabwo yabaye ikimaramare cabo, ntabwo yabamaramaje. Yabaye
akanyamuneza kabo mu kuvuka kwiwe, aba akanyamuneza kabo mu kurongorwa kwiwe, aba
akanyamuneza kabo mu kuvyara kwiwe, aba akanyamuneza kabo mu buzima bwiwe bwose.

Vy’ukuri rero, ivuka rya Bikira Mariya umuntu yovuga ko ritanguza iremwa rishasha: iremwa
rishasha ritsinda kamere ishaje y’umuntu, iremwa rishasha ritsinda igicumuro c’inyanduruko
cashikamiye umuntu imyaka n’iyindi; vy’ukuri Bikira Mariya yagikingiwe, aje kw’isi, umuco
wararashe. Mu bantu bose bari kw’iyo si y’ico gihe, ni we wenyene yari yifisemwo ubuzima
bushasha ; ubuzima yari yahawe ku buryo bw’agatangaza n’urupfu n’izuka rya Yezu Kristu ryaza
kubaho, maze wewe rikamugirira akamaro imbere y’uko rinaba, kubera ububasha burengeje bwa
Data na Mwana na Mutima Mweranda.

Ivuka rya Bikira Mariya ni ivuka ry’umwizigiro w’ugucungurwa kw’umuntu ; ugucungurwa kwacu
kwamuhereyeko, ni uwa mbere yacunguwe, maze atuvyarira umucunguzi natwe turacungurwa,
tuva ku ngoyi y’ububisha, tuva ku ngoyi y’ukwankana, tuva ku ngoyi y’ingeso mbi, tuva ku ngoyi
y’ubusambanyi, y’akaborerwe, y’ukwiba, Tuva ku ngoyi y’ikinyoma Yezu Kristu arimikwa, yimikwa
mu bemeye kuremwa bushasha na Mutima wiwe Mweranda, wa wundi yapfutse nyina Mariya
maze akatuvukira nk’uko babibwira Yozefu mweranda mu Njili y’uyu musi.
Mw’ivuka rero rya Bikira Mariya, turabonamo ivuka ryacu na twe, ivuka ryacu rishasha riciye
kw’ivuka rya Yezu Kristu. Ivyo vyose turabitega amatwi mu bisomwa vy’uyu musi. Vy’ukuri rero,
Yozefu baramubwira bati «Yozefu, mwene Dawudi, ntutinye kubana na Mariya, umugore wawe,
iyo nda afise yayisamye ku bubasha bwa Mutima Mweranda. Azovyara umwana w'umuhungu,
izina uzomwita ni Yezu, kuko ari we azokiza ibicumuro igihugu ciwe.» Ivyo vyose vyabaye ngo
ijambo ry'Umukama ryari ryavuzwe n'umuhanuzi ritahe, ngo: «Umwigeme azosama inda
ayivyaremwo umuhungu, bazomwita Emanweli, ni ukuvuga ‘Imana iri kumwe natwe’»
Hama mu gisomwa ca mbere basozereye bavuga bati « Azohaguruka aragize ubusho bwiwe
ububasha bw'Umukama n'ubukuru bw'izina ry'Imana yiwe. Bazokwicara batsimbatare, kuko
inganji yiwe azoyikwiza hose, gushika ku mbibe z'isi. Kandi, ni we nyene azoba amahoro ! »
Uwo ni Yezu Kristu mwene Mariya. Ivuka rya Bikira Mariya, ni ivuka ry’umwizigiro wose
w’ugucungurwa kw’umuntu. Yezu arabitwibutsa kandi aduhamagarira kwubaha nyene ku buryo
bwisangije uwo Muvyeyi wiwe.

Umuntu w’umukristu katolika yumva ko Bikira Mariya ataco avuze, akaba ata mwanya vy’ukuri
afise mu buzima bwiwe, uyu musi Yezu aramwibutsa ko yamumuhaye : « Mu rugendo urimwo
uza uransanga, naraguhaye Mama wanje. Mwihekeko uzonshikako bikoroheye kurushirizaho. »
Uko yamugabiye Yohani ku musaraba, Yezu Kristu yama arongora kuri Nyina wiwe abantu bose
baza bamusanga. Abantu rero barashobora kwanka iyo ngabirano(cadeau) ariko hahiriwe
abayemera; Mariya bakamugira nyina, maze akabavyaramwo ubwo buzima nyene; atari ivyo
kubana na Bikira Mariya umuhenda ; ugira ngo agufashe mu kwunguka kwawe hama ukwiwe
wanke kukwinjiramwo. Ivyo umweranda Ludoviko Mariya wa Monfort yarabitwigishije bihagije, ku
bijanye n’urukundo dutegerezwa kugirira Bikira Mariya nyarwo.

Vy’ukuri rero hariho umuntu yobwira Bikira Mariya ati : Mpa ibi n’ibi, mpa ibi n’ibi. Ndindira ibi n’ibi
! » ariko ugasanga ni wewe uvayanga aboro biwe, utuka aboro biwe, ugaya aboro biwe, mbere
Umweranda Tereza w’i Kalkuta yashizwe mu rwego rw’Aberanda uyu musi i Roma, ntagire icigwa
amwigisha. Ugasanga turi incuti za Bikira Mariya turi abarejiyo ba Mariya, ariko turi n’aba shetani
w’ukwihaya n’akagaye ; kugaya abantu baciye bugufi, kubahonyora ! Bikira Mariya yahonyoye
umutwe w’umwansi shetani na Sekwihaya. None uwo muvyeyi ubwo twogendana na we gute
twuzuye ukwihaya n’akagaye ?
Ni co gituma nyene mu gisomwa ca mbere igihe duhimbaza nyene ivuka ryiwe, ijambo
ry’Umukama ryabitwibukije mu majambo agira ati « Ewe Betelehemu Efurata, n'aho uri muto mu
bihumbi vy'ibisagara vy'Ubuyuda, ni wewe uzomvyarira uwuzogaba Israyeli »
N’aho uri muto ! Abantu bato cane. Data Umukama yatoye Bikira Mariya umwigeme w’i Siyoni
muto cane ! Ntabwo Ana na Yohakimu bari ibihangange vy’ico gihe. Bikira Mariya yavutse, mu
muryango woroheje, avukira ahantu horoheje, yamara Umukama aramutora, amutorera kuvyara
Umwami w’abami, Umwami w’isi n’ijuru Yezu w’i Nazareti ! Yezu Kristu akunda cane abaciye
bugufi, agakunda cane abitonda.

Kuri uyu musi wa Bikira Mariya duhimbaza ivuka ryiwe,

ububasha Umukama yashize mu kirenge ciwe, nibuhonyore umwansi w’ukwihaya yinjira muri
Ekleziya yiwe. Ugaca usanga abantu turihayagiza mu vyambarwa Bikira Mariya yatwambitse,
turabihonyoza abandi! ivyo na vyo birababaje.
Kuri uyu musi kandi twibuka ivuka rya Bikira Mariya, ibisabisho vy’Umuvyeyi Bikira Mariya
nibifashe abantu bose basamye uyu musi n’abazosama mu misi izokurikiraho, kwakira iyo
ngabirano y’ubuzima, maze ibintu vyo kwica abana babicira mu nda bihere muri iyi si. Iyo shetani
yo gukuramwo amada nimeneke umutwe, Bikira Mariya nayihonyore mw’izina rya Yezu. Abo
baziranenge bareke kubandanya kwicwa muri iyi si, izina rya Yezu niribakingire, amaraso ya
Yezu Kristu nabarwanire.
Ivuka rya Bikira Mariya, niribe ivuka ry’abo bana bose, bo mw’isi yose. Aho babangamiwe
n’ikiganza c’umuntu, n’ububisha bw’umuntu, mbere n’ubuhinga bwiwe bwa none bushaka
kubarandura mu nda ya nyina. Umuvyeyi Bikira Mariya nakingire abo bana bose.
Nakingire kandi imitima ikiri mitoyi iriko iravuka. Abo bantu bose bahimbariwe ko Yezu Kristu
arimwo arabakura mu bicumuro, yamara shetani irimwo irakurikirana irondera kubasubiza aho
bavuye.
Bikira Mariya nakingire abo bose barimwo baravuka uyu musi, biyemeza gukurikira inzira
y’urukiza, biyemeza kuvuka bushasha, bemera kuva mu kiganza ca shetani, Senzankano,
shetani Sekutarekurira, shetani Sebusambanyi, shetani Sekinyoma, na Sekaborerwe na
Senzankano, shetani w’indwano, shetani abiba ukuryana mu bantu.
Abo bose barimwo barava aho hantu, gusohoka muri uwo mwiza, binjira mu Muco, Yezu Kristu
Rukundo n’amahoro, Umwami w’amahoro wewe atanga amahoro kw’isi.
Abo bose Bikira Mariya nabarwanire, hareke kugira uwusubira mu biganza vy’umwansi. Izina rya
Yezu Kristu rininaharizwe muri bose.
Ingo Mutima wa Yezu !
Ingo udupfuke nk’uko wapfutse Bikira Mariya maze Yezu Kristu aninaharizwe muri twebwe mu
bihe vyose.
Nihaninahazwe Yezu Kristu yadupfiriye akazuka !
Ingo Mutima wa Yezu !
Mutima utagira agahonzi wa Bikira Mariya utuje imbere uturwanire mw’izina rya Yezu.
Bikira Mariya Mugabekazi wa ababaye cane udusabire.