ISAKHIWO
Siwukubumbeka kwendaba (umumo wendaba) ukusuka ekuqaleni kuze kuyofika ekugcineni. Isakhiwo
sinamabanga amathathu: isingeniso,umzimba isiphetho.
UMhlengi uthatha isinqumo sokufuna ukuziguqula ubulili abe ngumuntu wesifazane. Inkinga unentombi
athandana nayo uNontobeko kanti futhi akazi ukuthi uzomtshela kanjani uyise ukuthi uyigay. Le ndaba
yenzeka efulethini eThekwini lapho uMhlengi ayehlala khona.UMhlengi Ngidi uyahamba uyokwala intombi
yakhe uNontobeko kepha akamtsheli isizathu. UNontobeko kumphula umoya ukwaliwa ngale kwesizathu
kwazise wayemthanda uMhlengi ngoba kwakulisoka lakhe lokuqala. UMhlengi ushiya uNontobeko edidekile
uya kubo eGcilima.
Ufika eGcilima uyise uyamthatha uyomkhombisa isipho sepulazi amthengele lona. Uma bebuya kobona
ipulazi uMhlengi utshela uyise ukuthi yena uyi-gay. Lokho kumphatha kabi kakhulu uNgidi ngoba uMhlengi
wabe enguzinyobulala wakhe. Uze ajeqeze emuva akhumbule usuku okwazalwa ngalo uMhlengi ukuthi
walahlekelwa ngunkosikazi emva kokuzalwa kukaMhlengi nokwamenza wathatha isinqumo sokuthi angeke
aganwe ngoba esabela ukuthi hleze athole umuntu ozoyihlukumeza indodana yakhe. UNgidi akakwamukeli
ukuthi indodana yakhe i-gay ugana unwabu uyayixosha emzini wakhe usho ukuyichitha ubuchopho
ngenhlamvu.
UMhlengi simthola ebuyela eThekwini maqedane uthatha ibhanoyi ulibangisa eKapa uyozishintsha ubulili
abe umuntu wesifazane. Ukuhlinzwa kwakhe kuba yimpumelelo, ubuya esengumuntu wesifazane
eseshintshe negama waba uMahlengi Ngidi. Ubuyela khona eflethini eThekwini uhlangana noXolani Mpanza
emhlanganweni wosomabhizinisi abasafufusa. UXolani uyathatheka yile ntokazi, ekubeni eshade noLungile
futhi benezingane ezimbili. Ngakolunye uhlangothi noMahlengi naye unesoka lakhe elinguNdumiso.
Umlandi usethulela uLungile exabana noXolani ngenkathi ebuya ebusuku ekhaya enuka utshwala nesiqholo
sabantu besifazane, i‘Red Door’ uze ukhohlwa nawukuthi bekumele baye emcimbini nezingane. UNdumiso
isoka likaMahlengi usola uMahlengi ukuthi kungenzeka useqomile. UXolani uvakasha efulethini likaMahlengi
enamba 312 uhlangana noNdumiso umshaya kuze kuchitheke izidlo ayeziphethe. Umbuza ukuthi uyifunani
intombi yakhe.
Ngakolunye uhlangothi uNontobeko uphuma efulethini edunyelwa yikhanda emva kokwaliwa uMhleng
iuhamba engazi ukuthi uyaphi. Uzithela emotweni eyabe ishayelwa uNkululeko uyalimala. UNkululeko
uyamthatha umphuthumisa esibhedlela. UNkululeko umvakashela aze aphaphame uNontobeko esibhedlela.
UNkululeko ushela uNontobeko. UNontobeko uyala ukumqoma umtshela ngesoka lakhe okungavumi
liphume enhlizweni yakhe. Ekugcineni uNontobeko uyavuma ukuthandana nNkululeko ngaphansi
kombandela wokuthi ngabe uyovuma yini uma kwenzeka ehluleka endleleni (isu lokubikezela). UNkululeko
wala zonke izintombi ayenazo ulobola uNontobeko. Ngosuku olwandulela elomgcagco uNontobeko wala
uNkululeko ngenxa yokuthi unothando olumiyo / lweqiniso lukaMhlengi. UNkululeko uyahluleka ukubhekana
nale simo kwala noma umndeni wakhe usumncenga kodwa uyazilengisa uyafa.
UNontobeko ushiya izindimbane zabantu nomndeni wakhe ushaqekile ulibangisa eGcilima ukothungatha
uMhlengi. Ukwenza lokhu ngoba enothando nethemba lokuthi hleze uma bebonana futhi hleze babuyelane.
UNgidi ubuyelwa yithemba nothando lwendodana yakhe uma kufika uNontobeko. Uguqula isinqumo sakhe
sokuyiduba bayaphuma benoNontobeko bayothungatha uMhlengi eflethini Thekwini, eMlaza naseNtuzuma.
Bayahluleka ukumthola, uNgidi uqasha umseshi ozimele uShezi ukuba abathungathele uMhlengi.
UNdumiso yena uhlela itulo lokuyobamba inkunzi uNgidi ngoba efuna ukulobola uMahlengi amshade
bengaze bemthathele yena. Ulwazi lwemali kaNgidi uluthola kuSbu. Ngemuva kokwenza ucwaningo
ngoNgidi nokuziguqula igama lakhe uya kwaNgidi, ukhomba uNgidi no-anti ngesibhamu ababophe bese
ethatha imali. Uma esephuma esangweni kwaNgidi udubula abulale uNyambose. Uma uthando lukaXolani
selumehlula uMahlengi, uMahlengi ubhala incwadi ale uNdumiso ngoba esethanda uXolani. Ufika endlini
yakhe engekho ayifake ngaphansi kwesicabha.
UNomalanga,isithandwa sikaNgidi uxabana noNgidi ngoba ehambe engashongo kanti bekumele bebe
nezingxoxo zamalobolo. Indaba yokuthungathwa kukaMhlengi imphatha kabi uNomalanga. UXolani
uyahamba uyoqhetha noMahlengi ushiya ekhiyele izingane zodwa uLungile esemsebenzini. Kusala kuyasha
umuzi nezingane zafela khona kuwo lowo mlilo. UXolani ushiya uLungile nezihlobo emakhandleleni
ulibangisa efulethini likaMahlengi. UShezi utshela uNgidi ukuthi umtholile uMhlengi. Uyabathatha
uyobakhombisa ifulethi akulo.
UNgidi, uNontobeko kanye noNomalanga befika efulethini likaMhlengi. Bathola izindaba ezibethusayo
zokuthi uMhlengi sewaziguqula ubulili waba owesifazane. Kulowo mnyama kufika uXolani, naye uzwa lezi
zindaba abengazazi ngesithandwa sakhe uyakhala ngoMahlengi, uyazisola.
Zonke izinto zisuke sezibuyela esimweni esejwayelekile. Kule ngxenye umbhali usuke eseyisonga indaba
yakhe. Umbhali wale noveli uyiphethe kahle indaba yakhe ngoba uyiphethe kuvuthondaba. Umfundi usala
nemibuzo eminingi engqondweni yakhe ngokwasala kwenzeka emuva kwalesi sigameko.
UVO LWAMI
Umbhali ukwazile ukusebenzisa ikhono lokubumba isakhiwo sale noveli. Amazinga anikezelana kahle
ukusuka esingenisweni kuze kuyofika esiphethweni. Kanjalo nemfihlo kaMhlengi yokushintsha ubulili igcina
ivele obala. ( inani lamagama 677)
